உங்கள் கோபத்துக்கு நீங்களே பொறுப்பு

215

மனிதனின் கோபத்துக்குப் பல காரணங்கள் இருக்கின்றன. மன அழுத்தம், எரிச்சல் ஏற்படுத்தும் சூழ்நிலைகள் அல்லது மனிதர்களால்தான் பெரும்பாலும் கோபம் ஏற்படும். கோபத்தைக் கட்டுப்படுத்த ஐந்து வழிகள்…

கோபத்தைப் புரிந்துகொள்ளுங்கள்!

கோபத்தைக் குறைக்க, முதலில் அது எப்படி ஏற்படுகிறது என்பதைப் புரிந்துகொள்ள வேண்டும். எந்தச் சூழ்நிலையில், யாரால் கோபம் ஏற்படுகிறது என்பதைக் கவனியுங்கள். அந்த நபர்களையும் சூழலையும் தவிர்ப்பதற்கு முயற்சி செய்யுங்கள்.

அட்டவணை போடுங்கள்!

ஓர் அட்டவணையைத் தயார் செய்யுங்கள். உங்களுக்கு மன அழுத்தம் ஏற்படுத்தும் சூழல், எரிச்சலடையச் செய்யும் சூழ்நிலை, எரிச்சலைக் கோபமாக்கும் சிந்தனைகள், நிகழ்வுகள், கோபத்தில் நீங்கள் நடந்துகொள்ளும் விதம் ஆகியவற்றை எழுதுங்கள். இவை, உங்களுக்குக் கோபம் வருவதற்கான காரணங்களை அறிந்துகொள்ள உதவும்.

அமைதியைக் கற்றுக்கொள்ளுங்கள்!

பதற்றத்தைக் குறைத்துவிட்டாலே, கோபத்தைப் பாதி வென்றது மாதிரிதான். தசைகளைத் தளர்வாக்கும் உடற்பயிற்சிகளைச் செய்யலாம்; சிரிப்பு யோகா செய்யலாம்; எதையும் நேர்மறையாக அணுகும் மனப்பான்மையை வளர்த்துக்கொள்ளலாம். மனதை அமைதிப்படுத்தும் இயற்கையான சூழல்களைக் கற்பனை செய்தாலேகூடப் போதும்.

உங்கள் உணர்வுகளுக்கு நீங்களே பொறுப்பு!

வேறொருவர் வந்து உங்கள் கோபத்தைக் குறைப்பது சாத்தியமில்லாதது. நீங்களே அதற்கான வழிகளைத் தேர்ந்தெடுத்துக் கோபத்தைக் குறைக்கப் பார்ப்பதுதான் சிறந்த வழி.

சுவாசத்தைக் கவனியுங்கள்!

கோபமாக இருக்கும்போது உங்கள் சுவாசம் படபடப்புடன் வேகமாக வெளிப்படும். அந்த நேரத்தில் ஆழ்ந்த சுவாசப் பயிற்சி மேற்கொண்டால் கோபம் படிப்படியாகக் குறையும். இந்த வழிமுறைகளை இன்றே தொடங்கிவிடுவது சிறந்தது.

– மு.இளவரசன்